So kharo sa lalag na aden a atoran iyan ka oba mabaloi so petharo sa lalag a peka kaso-kasoy so diniyan gii tharoon(redundant) So khataro sa lalag na mbidabida I sunad pasodan antap sii kailai ko masa a kalilimod (Occasion) aya pahala o petharo sa lalag na so kakowai sa gona ko petharoon iyan a maka-aayon ko masa a kalilimod a petharooan iyan sa lalag. So patataro sa lalag na na katii so mga atoran iran.

Bismillah irrahman irrahim, wasato wasalamo ala nabi Muhammad, mizagipoon ako ko ingaran o kadnan a maporo na siyalawatan aken so rasul a giyanan so tihaya a sindao a maliwag, na indawag aken rekano angkai a SALAM a kalilintad a gii mikekenala o langowan a Muslim sa dalma donya , Assalamo allaikum warahma tulla hi wabarakato,

Oriyan a giyanan a Salam na mbalowin ko a giyanan den I panabia akun ko langwan a mga ala I kadatu sa ranaw, so manga panorogan so manga sulutan ago so gii governo ko kapepa laolad o ompia sa inged a ranaw, ka siran na sii kiran matatago so atas tanggongan ko kaphaginged na go siran I koma kapet ko egma ago so taritib sa Phangampong a ranao,

Sabap san na pagodas ako daan ko kapaka dadarepa o Sulutan sa Unayan a kapapantagana (position) kataya a makamamasa a giya kababantogan a (position) a sekaniyan I kapapantagan a Datu a cabugatan sa Masiu, Sabap sa da kamasai ko Sulutan sa Baloi na pagodasan akenpen, na aya mala a pagodasan aken na giya babai aken a potri maamor a darodopa o Sulutan sa Bayabao. Na pagodasan aken sukano langon a lokes pagari ko wata aken a makamamasa imanto a kalilimod a kandiamonga.

Giyangkai a masa tano a kandiyamonga, na masa a kapakalaba, na kalilimod a kapakadair, na oras a katagompiya, sabap sa maphakarani niyan so miyakawatan a kathotonganaya, na maphakaloto iyan so miyakalogao a kambata-bataa na kailot iyan so miyakaloag a kathatabanga na aya mala na mapakagarang iyan so kiyatepolan a dii kanggiginawai,

Mipantag san manga lokes pagari ko balowin tano a giya I a kiya kamonga angkai a dowa kambala na makaselang sa maliwag a angkai a dowakatao a piyakatapi tano na rizkiyan siran o kadnan sa halal na pakapemoriataon siran o Allah sa Salih, Saliha, manga Dr, Kaningkir, Engineer Abokado, Atty, maetro maistra Teacher, na rakes a mamakasoled siran ko sorga o Allahu ta Allah.

Ayakaposan ang kai a lalag ko na panalamatan aken ang kai a mbala a mindiamonga sa dairan kapakandarainon sa kiya paka tokawa iran rekami ago giya darodopa aken sangkai a kalilimod, Na pamangni ako rekanopen sa maaf oba aden a dako katarotopi ko kiyapayag o sariat o lalag ko sabap sa kangodaan akopen a gopen gii sinanad, sa ayamala na sobo so kadnan I daa pawing iyan. Wassalam